ҚАУЛЫ

2026 жылғы 22 сәуір №6003-26-00-4к/108 Астана қаласы

Қазақстан Республикасының Әкімшілік істер жөніндегі кассациялық сотының құрамы: төрағалық етуші - судья Д.А. Әбдіғалиев, судьялар - М.А.Қасымов, Г.М.Ыдырысова, прокурор К[...], мүдделі тұлға ЖК А[...]-ның өкілі Қ[...] қатысуымен,

мүдделі тұлға дара кәсіпкер А[...] Шымкент қаласының мамандандырылған ауданаралық әкімшілік сотының 2025 жылғы 27 маусымдағы шешіміне және Шымкент қаласы сотының әкімшілік істер жөніндегі сот алқасының 2025 жылғы 7 тамыздағы қаулысына кассациялық шағымы бойынша келіп түскен,

дара кәсіпкер Б[...] Шымкент қаласының «Мемлекеттік сатып алу басқармасы» мемлекеттік мекемесіне үш конкурс хаттамаларын, талап қоюшының шағымы бойынша шешімдерін заңсыз деп тану және олардың күшін жою, конкурстар нәтижелерін қайта қарау міндетін жүктеу туралы талап қоюы әкімшілік істі ашық сот отырысында қарап,

АНЫҚТАДЫ:

Талап қоюшы жоғарыда аталған әкімшілік талап қоюмен сотқа жүгінді.

Шымкент қаласының мамандандырылған ауданаралық әкімшілік сотының 2025 жылғы 27 маусымдағы шешімімен талап қою қанағаттандырылды. 2025 жылғы 8 сәуірдегі № 13839943-1, № 141719131, № 13840124-1 конкурстардың нәтижелері, талап қоюшының шағымдары бойынша ұйымдастырушының шешімдері заңсыз деп танылды және олардың күші жойылды. Сот жауапкерді конкурстар нәтижелерін қайта қарауға міндеттеді.

Шымкент қаласы сотының әкімшілік істер жөніндегі сот алқасының 2025 жылғы 7 тамыздағы қаулысымен бірінші сатыдағы соттың шешімі өзгертілді: № 13839943-ОК1 конкурсы бөлігінде (№ 68 мектеп) талап қоюдан бас тартылды; қалған бөлігінде шешім өзгеріссіз қалдырылды.

Кассациялық шағымда мүдделі тұлға А[...] № 14171913-ОК1 конкурсы (№ 142 мектеп) бөлігінде сот актілерінің күшін жоюды және осы бөлікте талап қоюдан бас тарту туралы жаңа шешім шығаруды сұраған. Төменгі сатыдағы соттарда қатысқан, сот отырысының күні, уақыты және форматы туралы тиісінше хабардар етілген өзге тұлғалар сот отырысына келмеді, келмеу себептері туралы сотқа хабарламады. Қазақстан Республикасының Әкімшілік рәсімдік-процестік кодексінің (бұдан әрі - ӘРПК) бірінші бөлігінің 115-бабына сәйкес әкімшілік іске қатысатын адамдардың келмеуі оларға тиісінше хабарланған жағдайда сот отырысын өткізуге кедергі болып табылмайды. Мүдделі тұлғаның өкілін, прокурордың шағымды қанағаттандырусыз қалдыру туралы қорытындысын тыңдап, кассациялық шағымның дәлелдерін талқылап, іс материалдарын зерттеп, кассациялық сот мынадай қорытындыға келді.

ӘРПК-нің 169-бабы бірінші бөлігінің талаптарына сәйкес кассациялық шағым жасау және кассациялық сатыдағы сотта іс жүргізу тәртібі Қазақстан Республикасының Азаматтық процестік кодексінің (бұдан әрі - АПК) қағидаларында айқындалады.

Заңсыз сот актiсiн шығаруға әкеп соққан, АПК-нің 427-бабында көзделген материалдық және процестік құқық нормаларының елеулi түрде бұзылуы АПК-нің 434-бабының бірінші бөлігінде көрсетілген, заңды күшіне енген сот актілерін кассациялық тәртіппен қайта қарауға негiздер болып табылады.

Апелляциялық сатыдағы сот мұндай бұзушылықтарға жол бермеген.

Іс материалдары бойынша 2025 жылғы сәуірде Шымкент қаласының № 68, № 142 және № 148 мектептерінде тамақтандыруды ұйымдастыру бойынша мемлекеттік сатып алу жүргізілген.

Конкурстар нәтижелері бойынша № 68 және № 142 мектептер бойынша жеңімпаз деп ДК А[...], № 148 мектеп бойынша - ДК Б[...] танылған. ДК Б[...] тең балл жинаған (18), бірақ өтінімді беру кезектілігі өлшемшарты бойынша ұтылған. Конкурстар нәтижелеріне дау айта отырып, талап қоюшы еңбек ресурстары және аспаздардың біліктілігі өлшемшарты бойынша жеңімпаздарға баллдар есептеу кезіндегі бұзушылықтарды көрсетті. Сот талқылауы барысында бірінші сатыдағы сот Еңбек шарттарын есепке алудың бірыңғай жүйесінен (бұдан әрі - ЕШБЖ), Мемлекеттік еңбек инспекциясынан, Бірыңғай жинақтаушы зейнетақы қорынан (бұдан әрі - БЖЗҚ) және Шымкент қаласы Кәсіпкерлер палатасынан мәліметтер сұратып, зерттеді.

Төменгі сатыдағы соттар ДК А[...] өтінімінде төрт аспаз көрсетілгенін, олардың болуы іс жүзінде расталғанын анықтады.

Атап айтқанда, өтінімдерді бағалау күніне 2025 жылғы 8 сәуірге ЕШБЖ-дегі және басқа жүйелердегі деректер ұсынылған мәліметтерге сәйкес келмеді. Бірнеше аспаздың алдыңғы жұмыс орындарынан жұмыстан шығарылуы туралы жазбалары болмады. Конкурс кезінде кейбір аспаздар өзге жұмыс берушілерде есепте болған.

Конкурстық комиссия бұл мәліметтерді мемлекеттік ақпараттық жүйелер арқылы тексермеген.

Бірінші және апелляциялық сатыдағы соттар аспаздардың біліктілігі туралы мәліметтердің расталмауы конкурстық құжаттама және заңнама талаптарының елеулі бұзылуы болып табылатыны, бұл конкурс нәтижелерін жоюға алып келетіні туралы негізді қорытынды жасады. А[...] кассациялық тәртіппен сот актілерін тек № 14171913-ОК1 конкурсы (№ 142 мектеп) бөлігінде ғана шағым жасаған, осы мектеп бойынша талап қоюдан бас тартуды сұраған. Апелляциялық сатыдағы соттың қорытындыларын осы бөлікте тексеріп, кассациялық сот шағым жасалған қаулы заңды шығарылды, құқықтық ұстаным істің мән-жайларына және осы жағдайда қолданылуға тиіс материалдық және процестік құқық нормаларына сәйкес келеді деп есептейді.

Кассациялық шағымның төрт аспаздың орнына екі аспаздың жеткіліктілігі туралы, шағымдар берілгеннен кейін алынған анықтамалар туралы дәлелдері негізсіз ретінде қабылданбады.

Мамандардың ең аз саны қатысушыны олардың әрқайсысы туралы дұрыс мәліметтер ұсыну міндетінен босатпайды.

ЕШБЖ мен БЖЗҚ-дан алынған үзінділер өтінімді беру сәтіне А[...] аспаз ретінде бір жылдық жұмыс өтілінің болуын нақты растамайды. Бұл конкурстық құжаттаманың және Қазақстан Республикасы Білім және ғылым министрінің 2018 жылғы 31 қазандағы № 598 бұйрығымен бекітілген Мемлекеттік білім беру ұйымдарындағы оқушыларды, мемлекеттік білім беру ұйымдарындағы жетім балалар мен ата-ана қамқорлығынсыз қалған балаларды, техникалық және кәсіптік, орта білімнен кейінгі білімді тамақтандыруды ұйымдастыру қағидаларының талаптарын бұзады.

Шағымдар берілгеннен кейінгі кезеңге С[...] мен Б[...] бойынша БЖЗҚ анықтамалары мен ЕШБЖ деректеріне сілтеме жасалған бөлігіндегі кассациялық шағымның дәлелдерін кассациялық сот қабылдамады, өйткені біліктілік талаптарына сәйкестік өтінімді беру сәтіне болуға тиіс.

Жоғарыда баяндалғанды ескере отырып, кассациялық сот шағым жасалған сот актілерінің күшін жоюға негіздер таппады, кассациялық шағым қанағаттандырылуға жатпайды.

ӘРПК-нің 169-бабының бірінші бөлігін, АПК-нің 451-бабы екінші бөлігінің 1) тармақшасын басшылыққа ала отырып, кассациялық сот,

ҚАУЛЫ ЕТТІ:

осы іс бойынша Шымкент қаласы сотының апелляциялық алқасының әкімшілік істер жөніндегі 2025 жылғы 7 тамыздағы қаулысы күшінде қалдырылсын.

Мүдделі тұлға дара кәсіпкер А[...] кассациялық шағымы қанағаттандырусыз қалдырылсын.

Төрағалық етуші судья Д. Әбдіғалиев Судьялар М. Қасымов